Amos

Amos is die 30ste boek in die kanon van Hebreeuse Geskrifte wat as die Ou Testament in die Bybel opgeneem is. Hierdie boek is die derde van die sogenaamde twaalf Klein Profete. Alhoewel Amos uit Juda afkomstig was, het hy teen die middel van 8ste eeu v.C. as profeet teen die noordelike Israel opgetree. Dit was 'n tyd van materiële welvaart, politieke stabiliteit en uiterlike godsdienstige aktiwiteit, maar ook van geestelike verval en van ernstige wanpraktyke op sosiaal-etiese gebied. Amos rig hom veral teen die sondes van onderdrukking, uitbuiting van armes en verkragting van die reg. In die slotverse van sy boek kondig hy Israel se herstel aan.